معقودة البطاطاس بلا قلي

المقادير :
بطاطس مقشرة مبخرة او مسلوقة
ضرس صغير ثوم
ربيع مشلض غليض
فرماج احمر محكوك
موزريلا محكوكة
ملعقة صغيرة كامون
راس ملعقة صغيرة ابزار
ملح
ملعقة صغيرة زبدة
بيضة
رشة ملون

الطريقة:
بعد متبخر البطاطة كنقيوها و نحكوها فالحكاكة و كنحكو ايضا الفرماج الاحمر و الموزريلا و نديرو الكل فإناء و كنضيفو ضرس صغير من الثوم المدقوق و الملح و الكامون و الابزار و الزعفران الملون و الزبدة و الربيع

و نخلطو كل المكونات حتى تتمازج باطراف الاصابع بلا منعجنوها غير نخلطوها مزيان و نبداو نديرو كويرات متساوية الحجم و نڭرصوها فكف اليد المبلل بالماء
و نستفوها فالطاوة طبعا المعقودة فيها الزبدة و الفرماج و البيض غيتحمرو بوحدهم بدون زيت و نخليوها تتحمر و تكتاسب اللون الذهبي الشهي


بالصحة والراحة