قصة سراق الزيت الحزينة

قصة سراق الزيت الحزينة !!
"
"
"
كان سراق الزيت غادي كايدور فالكوزينة !!
تالف مابين الطباسل والكيسان والروينة !!
حتى خرجات ليه واحد الصرصورة آية فالجمال زوينة !!
ڭال ليها بس بس الزين نهار كبير هذا جيتي فيه تشوفينا !!
المهم ڭال ليها آش بان ليك نطلعو نتمشاو فوق البوطاجي نسرحو رجلينا !!
ولا شفتي آش نديرو خلي حتا طيح الظلمة ويخوا المطبخ ماتبقا دور لا حرية لا بنتها ياسمينة !!
وآجي ندير شي موعد حدى الڭصعة ديال العجينة !!
هي ماجاوباتوش بقات ساكتة وهو يقول وآآآه هضري وسمعينا صوتك ماتبخليش علينا !!
بقا غي يشوف وهز فراسو وڭال واقيلا مابغاتنيش حيت أنا خيبوع ولا ماعجباتهاش التحسينة !!
دازت على سراق الزيت ليلة حزينة !!
اليلة كاملة وهو يعاود نفس الجملة "علاش خلاتني أنا راه عندي الدار وبفلوسي ومن الفوق ولد المدينة !!
المهم داز داك النهار بيخير وفي الغد تعرض ليها فالطريق وڭال ليها واش عجباتك هاد الحالة !!
وهي ترد عليه بعد من طريقي آش هاد البسالة !!
تفو على سراق الزيت كيف داير يخ على حثالة !!
وهي تدعي عليه سير أنا بغيتلك الموت تنزل عليك مولات الدار بشي صندالة !!
وهو بقا فيه الحال وڭال ليها أنا لي فييا العيب خليت النحلة والفراشة وجيت عند آوجه البالة !!
هي مشات وهو كمل طريقو فالمطبخ الخالي !!
غادي فوق البوطاجي حتا جاتو ضربة من الأعالي !!
كانت صدمة قوية حيت ضرباتو مولات الدار بصباط راجلها الماداني !!
مات مسكين ومشات معاه كل الآماني !!
والصرصورة بدات تغني وتشطح داني داني داني !!
وقالت موت موت يا سراق الزيت راه عندي فارس الأحلام ديالي !!
وراك غي عذبتي راسك ماشي نتا لي فبالي !!