حشوة بسطيلة الحوت عمري بيها البريوات

من طرف **بلقيس** الجمعة أبريل 29, 2016 12:17 pm

كناخدو 2 بصلات كبار مشلضين نعملهم يتحمرو ف المقلاة على نار مهيلة نضيفو شوية المعدنوس والقصبور مقطع صغير +شوية سكنجبير +الكمون +شوية فلفل احمر+الملح وشيوة د الما و حتى تدبال البصلة وتترخى وينشف الما منها غنضيفو شوية كروفيت بعد تقشيرها ونختفضو بالقشور وكنور الحوت والشمبنون مقطع صغير والزيتون الاخضر مقطع دواور والهريسة او لاصوص حارة
تطيب الكروفيت نطفي المقلاة
ف كسرونة غادي نعملو زلافة كبيرة الما نغليو القشور د الكروفيت الي حيدنا وغسلناهم من بعد ما يغلى الما ويعاود نصفيو داك الما المنسم بقشور الكروفيت ونعملو فيه شوية الكلامار شي 5 دقايق ونضيفو معاه الشعرية الصينية وملعقة زيت من بعد ما تترخى شوية نعليو البوطة باش تشراب داك الما واحنا كنقلبوها باش ما تلصقش ف الكسرونة ونزولوها ونصفيوها ونضيفوها على خليط البصل ونخلطو نخلوها تبرد تماما عاد نعمرو بيها ورقة البسطيلة على شكل سيكار او مثلاتات
نسيت قطعي الشعرية بالمقص من ترطاب فالماء باش اسهال عليك تعمار الورقة